Beth sy'n nesaf i Dr Chloë George a'i chynlluniau ymchwil?

Ym mis Medi eleni cymhwysodd Dr Chloë George fel Gwyddonydd Clinigol Ymgynghorol, y cyntaf mewn meddygaeth trallwyso yng Ngwasanaeth Gwaed Cymru.

Edrychodd ei phrosiect ar fetabolaeth platennau mewn amgylcheddau storio oer a chymharu hynny â phlatennau sy'n cael eu storio ar dymheredd ystafell safonol.

Mae platennau angen egni i gyflawni eu swyddogaeth yn y corff a'r syniad oedd gweld a yw'r platennau, pan gânt eu storio ar dymheredd oer, yn mynd i ffurf o stasis lle nad ydynt yn defnyddio llawer o egni a allai hwyluso cyfnodau storio hirach.

Perfformiwyd yr ymchwil hwn gyda phlatennau gan roddwyr afferesis, a chadarnhaodd ymchwil a wnaed gan eraill ledled y byd - nid oedd proffiliau bio-egnïol yn dangos gwahaniaeth sylweddol rhwng platennau gan un rhoddwr a storir yn oer o'u cymryd a rhai wedi'u storio mewn tymheredd ystafell. Roedd hyn er gwaethaf y ffaith bod marcwyr metabolaidd eraill yn awgrymu bod yr oerfel yn arafu metabolaeth.

Y cam nesaf yw profi platennau cyfun wedi'u storio'n oer gan ddefnyddio platennau cyfun gan bedwar rhoddwr, sef y broses arferol ar gyfer gweithgynhyrchu rhoddion platennau.

Y gobaith yn y dyfodol yw y bydd Gwasanaeth Gwaed Cymru yn arwain treial clinigol i brofi'r defnydd o blatennau sydd wedi'u storio'n oer yn yr amgylchedd cyn ysbyty mewn cydweithrediad â'r Gwasanaethau Adalw a Throsglwyddo Meddygol Brys (EMRTS).

Yn ogystal â pharhau â’i rôl ymchwil, mae gan Chloë rôl glinigol o fewn y sefydliad gan ddarparu cyngor clinigol i gleifion ochr yn ochr â chydweithwyr meddygol a chymryd rhan yn y rota ar alwad meddygol.

“Rwyf wedi bod yn wyddonydd yn WBS ers 23 mlynedd ac wrth weithio yn y labordai nid oeddwn yn aml yn gweld yr effaith y mae’r gwaith rydym yn ei wneud yn ei gael ar ochr y claf, sef un o’r pethau rwy’n ei garu am fy swydd bresennol.

“Mae bod mewn sefyllfa i roi cyngor clinigol ar gyfer achosion trallwyso cymhleth ledled Cymru, a rhoi cyngor ar draws-baru a gwaed cydweddol yn dangos sut mae rhoi gwaed yn achub bywyd.

“Fy uchelgeisiau yn y dyfodol yw parhau i atgyfnerthu fy ngwybodaeth glinigol a thyfu’r Labordy Ymchwil Datblygu Cydrannau – ar ôl chwe blynedd rwy’n meddwl y gallaf ddweud fy mod yn bendant wedi gorffen astudio am y tro!”